سياسة الاسترداد

١. لو دفعت قبل الانطلاق

لو حجزت مكانك بتحويل قبل ١ ديسمبر ٢٠٢٦، من حقك تسترد المبلغ **بالكامل في أي وقت قبل الانطلاق** — من غير ما تدّي سبب ومن غير أي خصم.

الحجز ده مش اشتراك لسه. الاشتراك بيبدأ يوم الانطلاق، ومن اليوم ده بيسري البند اللي بعده.

ولو الانطلاق اتأجّل عن ١ ديسمبر ٢٠٢٦ لأي سبب، بنبلّغك، ومن حقك تسترد المبلغ بالكامل ساعتها.

٢. بعد ما تشترك — مفيش استرداد

بعد ما تشترك وتدفع، المبلغ مش بيترد. لا كامل، ولا جزئي، ولا بالتناسب مع باقي الشهر.

وده بيسري على أول اشتراك وعلى كل تجديد بعده.

السبب إن الاشتراك بيديك الشهر كامل من أول لحظة: المحتوى كله، والمجتمع، والجلسة اللايف. اللي دفعت عنه بيبقى تحت إيدك من يوم ما تدفع.

٣. مش مبسوط؟ ألغي في أي وقت

لو في أي وقت حسّيت إن الاشتراك مش مناسب ليك، ألغي — دلوقتي، أو قبل الدفعة الجاية. مفيش مكالمات ولا أسئلة ولا محاولة إقناع.

لما تلغي، اشتراكك **بيفضل شغال لحد تاريخ دفعتك الجاية**. بتكمل الشهر اللي دفعت عنه عادي، وبعدها مش بيتخصم منك أي حاجة تانية.

ما دام الدفع بالتحويل، الإلغاء معناه ببساطة إنك ما بتحوّلش الشهر الجاي — مش محتاج تعمل أي إجراء. وبعد ما بوابة الدفع تشتغل، هتقدر تلغي من إعدادات حسابك.

٤. إزاي تطلب الاسترداد في الحالتين دول

الاسترداد متاح في حالتين بس: البند ١ (دفعت قبل الانطلاق)، والبند ٦ (إحنا اللي ما قدمناش الخدمة).

ابعتلنا على بريد الدعم الرسمي واكتب إنك عايز تسترد، واذكر رقم الواتساب اللي سجّلت بيه عشان نلاقي حجزك. وتقدر كمان تطلب الاسترداد من نفس محادثة الواتساب اللي اتفقنا فيها.

بنرد على الطلب خلال يومين عمل، وبيتم تنفيذ الاسترداد خلال مدة أقصاها ١٤ يوم من قبولنا للطلب.

٥. طريقة رد المبلغ

بيتم رد المبلغ بنفس وسيلة الدفع اللي اتستخدمت. لو دفعت بتحويل بنكي أو محفظة إلكترونية، بيترد تحويل على نفس الحساب أو المحفظة اللي حوّلت منها — عشان كده بنطلب صورة إثبات التحويل مع طلب الاسترداد. ولو دفعت بالكارت، بيترد على نفس الكارت طبقًا لقواعد شبكات الدفع.

مدة الظهور بتعتمد على البنك أو المحفظة، وغالبًا بتاخد من ٥ لـ ١٤ يوم عمل بعد تنفيذ الاسترداد من ناحيتنا.

٦. حالات خاصة

البند ٢ بيتكلم عن إنك غيّرت رأيك. البند ده بيتكلم عن حاجة تانية خالص: إننا إحنا اللي ما قدمناش اللي اتفقنا عليه.

لو الخدمة اتوقفت من ناحيتنا لمدة طويلة أو ما قدرناش نقدّم اللي معلن عنه، من حقك استرداد يتناسب مع الفترة اللي ما استفدتش فيها — حتى لو كانت تجديدة.

لو حسابك اتوقف بسبب مخالفة للشروط — زي مشاركة بيانات الدخول أو إعادة نشر المحتوى — مفيش استرداد للفترة المتبقية.

السياسة دي بتوضّح سياستنا التجارية. وزي ما مكتوب في شروط الاستخدام، مفيش حاجة هنا بتسقط أي حق مقرر ليك بموجب القانون المصري.